内地亲子真人秀《爸爸去哪儿》系列播出以嚟人气一直有增冇减，仲带旺同类型题材嘅节目，倒如《爸爸回来了》、《妈妈是超人》、还有黄贯中父女有份参演的处女作《想想办法吧爸爸》等。最近有指内地广电总局再收紧政策，令这一系列的亲子真人秀要延期播映，甚至播映无期，也有可能全部泡汤。
来自中，港，台甚至其他国家嘅明星爸妈带住星二代宝宝上节目，满足嗮fans对艺人私生活嘅好奇心。曾几何时子女係明星父母最想要保护嘅隐私，如今佢哋个个都想带小朋友上节目，体验生活之余赚高价片酬。
参加第一季《爸爸去哪儿》之前，张亮只係一个名气唔大嘅模特，《爸爸去哪儿》令佢同儿子天天一夜成为厨艺精湛嘅超级奶爸同阳光暖男宝宝。
陈小春同囝囝Jasper呢对父子同辣妈应采儿係观众最爱之一，上节目净袋3500万酬劳，小春一家同时都係最贵嘅家庭之一。
之不过内地政策朝令夕改，一时一个样，最近内地嘅广电总局颁发禁令，严格控制明星子女参加真人秀节目，禁止节目以明星博眼球嘅做法。所有嘅亲子真人秀突然瞬间被封印。
原定今年8月播出最新一季嘅《爸爸去哪儿》官方微博喺八月发布咗一条延期播出嘅声明之后就冇再更新。
Fans只能睇下小春同Jasper新一季宣传片止渴喇。
日前黄贯中带住佢同朱茵嘅囡囡Debbie黄莺上另一个亲子真人秀《想想办法吧爸爸》，出发拍节目当日朱茵一家三口机场含泪紧紧拥抱，一时成为热话。
节目组嘅官方微博最后一条发布咗黄贯中嘅宣传片之后亦再冇更新，似乎暗示节目播出无望。不过评论中仍然有大批网民质疑节目究竟仲播唔播。好多粉丝忿忿不平，认为黄贯中难得参加一次综艺，结果播唔出，质疑係节目组冇做好准备功夫而导致呢个结果。
而黄贯中9月份仲有喺微博帮节目宣传，之后就再冇提过。
朱茵微博9月6号转发完同囡囡一齐唱节目主题歌嘅短片之后，都冇再为节目宣传，睇嚟《想想办法吧爸爸》真係冻过水。
准备读小学，要以学业为重，之后黄莺应该都唔会再上节目喇。
日前朱茵出席活动嘅时候都有避重就轻回应呢件事，佢话宜家忙紧搞囡囡读小学嘅事，似乎对节目流产唔太在意，亦又可能已经接受咗事实。
朱茵同好姊妹陈法蓉搞美容生意，又忙紧带囡囡面试小学，都冇时间关注真人秀仲有冇得出街。
一个政策，令全部明星亲子节目化成灰，唔少fans都感到相当唏嘘。其实内地控制明星亲子真人秀嘅政策一直不断收紧，想当年《爸爸去哪儿》一直都喺电视台播，到后来只能成为网络综艺，宜家禁令再出，睇怕以后都好难再喺节目上睇到班得意星B嘅身影喇。
